माओवादीया ३० वडा कमिटीपाखें निष्काशित
येँ (सन्ध्या टाइम्स)/एनेकपा (माओवादी) येँ ३० वडा कमिटीया दुजः प्रकाश श्रेष्ठयात कमिटीपाखें निष्काशन याःगु दु ।
कमिटीया शनिवाः च्वंगु बैठकं थ्व निर्णय याःगु खः। मुँज्याय् निर्वाचन क्षेत्र नं. ६ पार्टी क्षेत्र नं. ११ या सेक्रेटरी रविन्द्र श्रेष्ठ व पार्टीया क्षेत्र नं. ११ अन्तर्गत इलाका नं. १ या सेक्रेटरी राजेन्द्र श्रेष्ठपिनिगु नं उपस्थिति दुगु खः। बैठकय् जानकारी बिउ कथं प्रगतिशील ल्याय्म्ह पुचःया नायः युनिश महर्जनया नेतृत्वय् याना वयाच्वंगु थीथी ज्याझ्वःयात दुःख बीगु नियतं प्रकाश श्रेष्ठं वडा कार्यालयय् मौखिक रुपं जानकारी बीगु व काठमाडौ जिल्ला कार्यालयय् लिखित रुपं रिपोर्ट तयेकाः ज्वंकेगु ज्या यानादीगुलिं वात पार्टीं निष्काशन यायेमाःगु खः। वं ज्वंकूम्ह युनिश महर्जनयात लिपा पार्टी दबावं येँया सीडीओ ज्याकुथी भ्वं याकाः त्वःतका हःगु खः ।
प्रकाश श्रेष्ठं थःथःगु इलाकाय् बांबांलाःगु ज्या यायेगु पलेसा छम्ह पासां मेम्ह पासायात ज्वंकेगु थेंज्याःगु पार्टी अहित जुइगु ज्या याःगुलिं आवंलि प्रकाश श्रेष्ठया नेतृत्वय् दुगु वा मेपिं पासानापं दुगु गुगुं नं संस्थां आर्थिक ग्वाहालि म्वः वल धाःसा वयात आर्थिक ग्वाहालि मयायेत नं सकलें सर्वसाधारणयात इनाप याःगु दु ।
