गोली काण्डबारे छानबिन यायेत समिति गठन
पुलाम्ह युवराज पारस शाहया गोली काण्डया बारे छानबिन यायेत गृह मन्त्रालयं छगू उच्चस्तरीय समिति गठन याःगु दु ।
गृह मन्त्रालयं प्रहरी नायव महानिरिक्षक गंगाप्रसाद पाण्डेया संयोजकत्वय् स्वम्ह दुजः दुगु छानबिन समिति गठन याःगु खः । उगु समितिया दुजःलय् प्रहरी वरिष्ठ उपरीक्षक रणबहादुर चन्द व सह अनुसन्धान निर्देशक अर्जुन केसी च्वनादीगु दु ।
थ्वस्वयां न्ह्यः नेपाली कांग्रेसं गोली काण्डय् संलग्न शाहयात तत्काल कारवाही यायेत माग यासें छगू विज्ञप्ति पिथंगु खः । विज्ञप्तिइ चितवन राष्ट्रिय नियुञ्ज स्थित टाइगर टप्स होटलय् शनिवाः बहनी उपप्रधानमन्त्री नापं कांग्रेस नेतृ सुजाता कोइरालाया ज्वाईं रुवेल चौधरीयात गोलीं क्येकूगु घटना प्रति कांग्रेसया ध्यानाकर्षण जूगु धासें दोषी शाहयात कारवाही यायेत माग याःगु खः ।
कांग्रेसं घटनाया दोषी शाहं थःम्हं हे घटना स्वीकार याःसां आः तक कारवाही मजूगु प्रति नं आश्चर्य प्वंकूगु दु ।
