संसद अधिवेशन बारे सत्तारुढ दलत दथुइ कच्वं
सत्तारुढ दलतय् दथुइ संसदया अधिवेशन सःतेगु विषयस कच्वं खनेदुगु दु ।
प्रधानमन्त्री ज्याकू सिंहदरबारय् थौं जूगु सहलहलय् ब्वति काःगु चिधंगु दलया प्रतिनिधितय्सं माओवादीं राष्ट्रपति समक्ष विशेष अधिवेशनया निंतिं समावेदन याये धुंकूगुलिं नियमित स्वयां न्ह्यः विशेष अधिवेशन हे सःतेत सुझाव ब्यूगु खः ।
चिधंगु दलया नेतातय्सं थथे मयसाः मेगू ज्या यायेत हानं राष्ट्रपति विवादय् लायेफइगु धासें विशेष अधिवेशन सःताः जक नियममित मुँज्याया निंतिं पलाः ल्ह्वनेत सुझाव ब्यूगु खः । तर चिधंगु दलया थंज्याःगु सुझावय् कांग्रेस-एमाले धाःसा सहमत मजू ।
कांग्रेस व एमालें विशेष अधिवेशन सःते माःगु छुं नं विषय हे मदुगु धासें नियमित अधिवेशन सःतेगु धाःगु खः । मुँज्याय् दलत दथुइ थुकीया बारे सहमति मजुइवं संसदया अधिवेशन गुवले सःतेगु धइगु जिम्मा सरकारयात हे ब्यूगु दु ।
