नियमित अधिवेशन सःतेत कानुन व्यवसायीतय् सुझाव
कानुन व्यवसायीतय्सं आःया अवस्थाय् विशेष अधिवेशन स्वयां नं नियमित अधिवेशन सःते माःगु धासें प्रधानमन्त्री माधवकुमार नेपालयात सुझाव ब्यूगु दु ।
माओवादी लगायतया दलतय्सं राष्ट्रपतियात समावेदन लःल्हायेवं थौं प्रधानमन्त्री नेपालं संसद अधिवेशनया बारे परामर्श यायेत कानुन व्यवसायीनाप याःगु सहलहया झ्वलय् इमिसं अज्याःगु सुझाव ब्यूगु खः ।
प्रधानमन्त्री निवास वालुवाटारय् जूगु सहलहलय् माओवादीं विशेष अधिवेशनया निंतिं याःगु समावेदन प्रधानमन्त्रीया उम्मेद्वारी व नियमित अधिवेशनबारे परामर्श यानादीगु खः । सहलहलय् ब्वति काःपिं कानुन व्यवसायीतय्सं माओवादीं प्रधानमन्त्री निर्वाचन व निमावली संशोधनया निंतिं जक विशेष अधिवेशन सःते फइगु जूगुलिं मेमेगू संसदीय कारवाहिया निंतिं सरकारं नियमित अधिवेशन आव्हान यायेफइगु धयादिल ।
कानुन व्यवसायीतय्सं सरकारं सःतुगु नियमित अधिवेशनय् प्रतिपक्षया माग संवोधन जुसाः स्वतः विशेष अधिवेशन सम्वन्धी माग लितकाइगु विश्वास प्वंकूगु खः । सहलहलय् टिकाराम भट्टराई, हरिहर दाहाल, हरिकृष्ण कार्की, माधव पौडेल लगायतया कानुन व्यवसायीतय् ब्वति दुगु खः ।
