पारसं गोल चले याःगु स्वीकार / परासयात कारवाही जुइ : मन्त्री
पुलांम्ह युवराज पारस शाहं शनिवाः बहनी चितवन राष्ट्रिय निकुन्ज स्थित टाइगर टप्स होटेलय् थःम्हं छगू राउण्ड गोली चले याःगु स्वीकार याःगु दु ।
पारसं म्हिग: छगू विज्ञप्ति पिथना थःगु व देय्या आपमान याइगु कथंया अव्यक्ति बीवं थःम्हं छगू राउण्ड फायर याःगु खँ न्ह्यथनादीगु दु । विज्ञप्तिइ अन च्वनाच्वंपिं छम्ह बंगलादेशी व मेम्ह छम्ह भारतीय नागरिकयात गोलीं क्येकूगु खःसां उगु फायर टागर टप्पसया भौतिक संरचना वा सुं नं व्यक्ति प्रति लक्ष्ति मजूगु खँ धयातःगु दु ।
शनिवाः बहनी टाइगर टप्स होटलय् परराष्ट्र मन्त्री सुजाता कोइरालाया ज्वाँइ रुवेल चौधरीयात गोलीं क्येकूगु खः । पारसं सामान्य विवाद लिपा कोइराला छेँजःया हुनिं हे राजतन्त्र समाप्त जूगु धासें चौधरीयात गोलीं क्येकूगु खः । तर थौं पारसं पिथंगु विज्ञप्तिइ धाःसा चौधरीया नां किटान मयासें थःम्ह हवाइ फायर यानाःगु जक स्वीकार याःगु दु ।
उखे शान्ति व पुनःनिर्माण मन्त्री रकम चेम्जोङ व आपुक्ति मन्त्री राजेन्द्र महत्तों गोली चलेयाम्ह पारस शाहयात कारवाही यायेगु खँ धाःगु दु । थौं जूगु बिस्कं बिस्कं ज्याझ्वलय् न्ववासें निम्ह मन्त्रीतय्सं घटनाया छानबिन यानाः पारस दोषी ठहर जुसाः कारवाही यायेगु धाःगु खः ।
