'गतिरोध अन्त्यया निंतिं सार्थक सहलह यायेगु जुइ'

येँ (सन्ध्या टाइम्स)/ नेपाली कांग्रेसया सभापति सुशील कोइरालां आः दलतलिसे थम्हं सार्थक सहलह ब्याकाः राजनीतिक गतिरोध अन्त्य यायेगु ख कनादीगु दु। आःया अवस्थाय् तक थ्यंगु नेपाःया शान्ति प्रक्रियायात सहमतिपाखें सफल यानां हे त्वःतेगु जुइ धकाः नं वय्कलं धयादिल। थौं सुथय् महाराजगन्जया थःगु छेँय् पत्रकारतलिसे खँ ल्हायेगु झ्वलय् वय्कलं अथे धयादीगु खः। सभापति कोइरालां सहमतिया विषय एकीकृत माओवादीयाके निर्भर जुइ धासें धयादिल, 'माओवादीं थम्हं न्ववानागु खँ गुलि पुरा याइगु खः व स्वयेगु ल्यं दनि।' वय्कलं दलतलिसे सहलह यानाः सहमतिपाखें संसदया अधिवेशन सःतेमाःगु नापं कांग्रेसया नेता रामचन्द्र पौडेलयात निर्विरोध प्रधानमन्त्रीइ निर्वाचित यायेमाःगु खँय् बः बियादिल। कांग्रेस दुने छुं नं कथंया विवाद मदु धकाः नं सभापति कोइरालां दावी यानादिल ।