थौं २७ दलया बैठक
येँ (सन्ध्या टाइम्स)/ संविधानसभाय् प्रतिनिधित्व यानाच्वंगु २७ दलया थौं सनिलय् बैठक च्वनीगु जूगु दु । उगु बैठकय् उच्चस्तरीय राजनीतिक कार्यदलया म्याद थप यायेगु लाकि मयायेगु, व्यवस्थापिका संसदया अधिवेशन, प्रधानमन्त्रीया चुनाव नापं संविधानसभाया बैठक सःतेगु विषयय् सहलह जुइ धाःगु दु। थौं न्हूबानेश्वरया संविधानसभाया भवनय् जुइगु उगु बैठकय् मूमू राजनीतिक दल एकीकृत माओवादी, नेपाली कांग्रेस व एमालेया नेतातय् दथुइ झन झन विश्वासया संकट ब्वलना वनाच्वंगु अले उकिं यानाः आःया अवस्थाय् राजनीतिक गतिरोध जुयाच्वंगु नापं आः तकया दुने उच्चस्तरीय राजनीतिक कार्यदलं संविधान निर्माणया निंतिं बिवाद जुयाच्वंगु विषयया खँय् ब्वलंकूगु सहमतिया सवालय् नं सहलह जुइ धाःगु दु ।
