नेपाः जुयाः १६म्ह पाकिस्तानी आतंकवादीत भारतय् : विकिलिक्स
अमेरिका लगायत थीथी देय्या गोप्य सूचंत सार्वजनिक यानाच्वंगु विकिलिक्सं लिप्पांगु इलय् पिथंगु छगू गोप्य सूचंलय् सन् २००९लय् नेपाः जुयाः १६म्ह पाकिस्तानी आतंकवादीत भारतय् वंगु खँ न्ह्यथनातःगु दु ।
विकिलिक्सया कथं भारतया न्हूगु दिल्लीस्थित अमेरिकी दुतावसं विदेश मन्त्रालयलय् छ्वःगु गोप्य दस्तावेजय् थुगु खँ च्वयातःगु खः । दस्तावेज कथं सन् २००९ जुन २६य् अमेरिकी राष्ट्रिय सुरक्षा सल्लाहकार जेम्स जोन्स व भारती रक्षामन्त्री ए. के. एन्टोन दथुइ जूगु नापलाय् ज्याय् भारतीय सेना प्रमुख दिपक कपुरं १६म्ह पाकिस्तानी आतंकवादीत नेपाः जुयाः भारतया प्रशासित क्षेत्र कश्मिरय् प्रवेश याःगु खँ धयादीगु खः ।
उगु नापलाय् ज्याय् कपुरं नेपाः व भारत दथुइ खुला सिमाना आतंकवाद विरुद्धया मू हाथ्या जूगु खँ धयादीगु खः । वय्कलं नेपाः जुयाः कश्मिर थ्यंपिं १६म्ह आतंकवादीतय्सं भारत विरोधी ज्या याःगु द्वपं तकं ब्यूगु दु ।
