राजनीतिक पार्टीलय् रुपान्तरण जू : ओली

नेकपा (एमाले)या नेता केपी शर्मा ओलीं हत्या व हिंसा त्वःता माओवादीयात राजनीतिक पार्टीलय् रुपान्तरण जुइत इनाप यानादीगु दु ।

एमाले नाङ्लेभारे स्वंक्वःगु गाँ कमिटीया शनिवाः स्थानीय चापाबोय् उलेज्या यासें नेता ओलीं माओवादीया ज्या आतंककारी व आपराधिक जूगु द्वपं बियादिल । वय्कलं अज्याःगु ज्या त्वःताः जनातया सुखदुःखय् साथ बियाः विकास निर्माणय् ग्वाहालि यानाः जनताया मन त्याकेत नं माओवादीयात इनाप यानादिल ।

संविधानसभाया निर्वाचन लिपा नं माओवादीं देय्या थीथी जिल्लाय् एमाले कार्यकर्ताया हत्या यानाच्वंगु धासें माओवादीया ज्या अराजकताया पराकाष्ट जूगु धयादिल ।