फौजय् परिणत जुइगु निंतिं तयार जुयादिसं : प्रचण्ड
एकीकृत नेकपा (माओवादी)या नायः पुष्पकमल दाहाल 'प्रचण्डं' विद्यार्थीत फौजय् परिणत जुइगु निंतिं तयार जुइत इनाप यानादीगु दु ।
अखिल क्रान्तिकारीया १८क्वःगु महाधिवेशनया थौं किपुली उलेज्या यासें वय्कलं प्रतिक्रान्तिकारीत पाखें षड्यन्त्र जुयाच्वंगु धासें अज्याःपिं प्रतिक्रान्तिकारीतय्त लिप्पांगु प्रहार यायेत विश्वविद्यालय व कलेजयात व्यारेकय् हिकाः विद्यार्थीतय्त फौजय् परिणत जुइगु निंतिं तयार जुइत इनाप यानादिल ।
प्रतिक्रान्तिकारीतय् षड्यन्त्र न्हापा स्वयां अझ तच्वयेक जुयाच्वंगु धासें प्रचण्डं विश्वविद्यालय व क्याम्पसयात ब्यारेकय् हिकाः नेपाःया क्रान्तियात निर्णायक मोडय् थ्यंके माःगु धयादिल । नेपाःमितय्सं याःगु आन्दोलनया उपलब्धीत तनीगु खतरा अप्वःगु धासें वय्कलं अज्याःगु उपलब्धी हनन् यायेत देय् दुने व पिनेया शक्तित सक्रिय जूगु धयादिल ।
माओवादीया स्वम्हं न्वकूत लगायत आपालं वरिष्ठ नेतातय् नं उलेज्या ज्याझ्वःलय् ब्वति दुगु खः । न्यान्हु तक न्ह्याइगु सम्मलेनय् ४२गू जिल्ललया १,८१८ प्रतिनिधि व पर्यवेक्षकतय्सं ब्वति कयाच्वंगु दु ।
क्रान्तिकारीया न्हूगु नेतृत्वया निंतिं वर्तमान न्वकूत युवराज चौलागाईं व रामदीप आचार्य नापं मू छ्याञ्जे हिमाल शर्मा मू दावेदारया कथं न्ह्यने वयाच्वंगु दु । स्वम्ह उम्मेदवारत मध्ये छम्हेसिया नांमय् सहमति यायेगु कुतः जुयाच्वंसां सहमति जुइमफुसाः वर्तमान नायः लेखनाथ न्यौपाने नं हे हानं नेतृत्वया भालाः काइगु नं सम्भावना दु ।
