सहमति मजूसा न्यौपाने हे अध्यक्ष
येँ (सन्ध्या टाइम्स)/एकीकृत माओवादीया भातृ संगठन अखिल नेपाल राष्ट्रिय स्वतन्त्र विद्यार्थी युनियन (क्रान्तिकारी)या १८ क्वःगु राष्ट्रिय सम्मेलनया उलेज्या थौं सनिलय् एकीकृत माओवादीया अध्यक्ष प्रचण्डं यानादीगु जूगु दु ।
थनिंनिसें २८ गते तक न्ह्याइगु उगु सम्मेलनय् देय् दुने व पिनेया यानाः १८१८ म्ह प्रतिनिधितय्सं ब्वति कयाच्वंगु दु।
उलेज्या समारोहय् १२ गू देय्या २४ म्ह विदेशी प्रतिनिधितय्सं नं ब्वति काइगु खँ दु। सम्मेलनय् ब्वति कायेत पेरु कम्युनिष्ट पार्टीया नायः गोन्जालोया काय नं येँय् थ्यंकः वयेधुंकूगु दु ।
किपूया त्रिभूवन विश्वविद्यालयय् अध्यक्ष प्रचण्डं उलेज्या यानादीधुंकाः अन हे बन्द सत्र शुरु जुइगु खँ धाःगु दु। थुगुसी 'जनताया गणतन्त्र, राष्ट्रिय स्वाधिनता व जनशिक्षाया पक्षय् १८ क्वःगु महाधिवेशन' धइगु नारा बिउगु दु ।
थुगुसी न्हूगु नेतृत्वया निंतिं उपाध्यक्षपिं रामदीप आचार्य, युवराज चौलागाई व महासचिव हिमाल शर्मा अध्यक्ष पदया उम्मेदवार जुइ धाःगु धयातःगु दुसां यदि सर्व सहमति मजुइगु अवस्था वल धाःसा हाकनं आःयाम्ह हे अध्यक्ष लेखनाथ न्यौपानेयात सर्वसम्मतं ल्ययेगु ज्या जुइफु धाःगु दु ।
