सिन्हःस्वां व नेपालमण्डलयात सिरपाः
येँ (सन्ध्या टाइम्स)/नेपाल संवत्या प्रचार प्रसारया ज्याय् योगदान याना वयाच्वंगु संस्थायात बीगु शंखधर सिरपाः थुगुसी निदँया छक्वलं बीगु जूगु दु। नेपाल संवत् ११३० या सिरपाः सिन्हःस्वां खलःयात व नेपाल संवत् ११३१ या सिरपाः नेपालमण्डल डट कमयात बीगु घोषणा जूगु दु ।
दँय्दसं स्वनिगलं पिने मोटरसाइकल र्याली यानाः नेपाल संवत्यात पिने पिने नं प्रचार यायेगु ज्याय् योगदान याःगुलिं सिन्हःस्वां खलःयात व वेबसाइट मार्फत विश्वन्यंकं च्वंपिं नेवाःतय् दथुइ नेपाल संवत् बारे प्रचार प्रसारया ज्या याःगुलिं नेपालमण्डल डट कमयात थुगु सिरपाः बीगु धकाः शंखधर सिरपाः समितिं निर्णय याःगु खः ।
आः वइगु थिंलागा १२ (पुस १७ गते) शनिवाः नगदेशय् छगू ज्याझ्वः यासें थ्व सिरपाः लःल्हाइगु ज्याझ्वः दु। थ्व सिरपाः कथं ११,०३०/- तका व ११,०३१/- दां व सिजःपौ बीगु खँ धाःगु दु ।
