वार्ता व सहलहपाखें समस्या समाधान : प्रम

प्रधानमन्त्री माधवकुमार नेपालं दलत दथुइ सहलह व वार्ता पाखें हे राजनीतिक समस्याया समाधान मालीगु खँ धयादीगु दु ।

झिन्हुन्यंकया विदेश भ्रमण क्वचायेकाः थौं येँय् थ्यंकादीम्ह प्रधानमन्त्री नेपालं त्रिभुवन विमानस्थलय् पत्रकारतनाप खँल्हाबंला यासें राजनीतिक गतिरोध ताःहाक जुयाच्वंगुलिं आः याकनं वार्ता व दलत दथुइया सहलह पाखें समाधान मालेमाःगु धयादिल ।

वय्कलं थः विदेश भ्रमणया झ्वलय् नं थीथी राजनीतिक दलया नेतातय्सं गतिरोध ज्यंकेत पहल यानाच्वंगु विश्वास प्वंकूसें थः दुसां मदुसां समस्या ज्यंकेगु निंतिं छुं नं लिच्वः मलाःगु दावी यानादिल ।

माओवादीं संसदया विशेष अधिवेशन आव्हानया निंतिं थीथी राजनीतिक दलतनाप सहलह यानाच्वंगु सन्दर्भय् प्रधानमन्त्री नेपालं विशेष अधिवेशन स्वयां नं दलतय् सहमतिलय् नियमित अधिवेशन सःते माःगु धयादिल ।