सभामुख व प्रचण्ड दथुइ संसद अधिवेशन आव्हान बारे सहलह
एकीकृत नेकपा (माओवादीं) विशेष अधिवेशन आव्हानया निंतिं कुतः यानाच्वंगु इलय् सभामुख सुभाषचन्द्र नेम्वाङं माओवादी नायः पुष्पकमल दाहाल 'प्रचण्ड'यात नापलाना सहलह यानादीगु दु ।
प्रचण्ड निवास न्हू बजारय् शुक्रवाः जूगु खँल्हाबंलाय् प्रचण्डं थःगु पार्टीं विशेष अधिवेशन आव्हानया निंतिं कुतः यानाच्वंगु धासें यदि विशेष अधिवेशन सम्भव मजुसाः नियमित अधिवेशन जुसां सःतेमाःगु खँय् बः बियादीगु खः ।
खँल्हाबंलाया झ्वलय् सभामुख नेम्वाङं विशेष अधिवेशन आव्हान यायेगु इलय् वइगु हाथ्याया बारे बिचाः यायेत प्रचण्डयात इनाप यानादीगु खः । वय्कलं विशेष अधिवेशन वा नियमित अधिवेशन न्ह्याःगु जुसां दलतय् सहमतिलय् आव्हान यायेमाःगु खँ धयादीगु खः ।
अथेहे सभामुख नेम्वाङं दलतय्सं राजनीतिक गतिरोध क्वचायेके मफुगु खःसा थःत अधिकार बीत प्रचण्डयात इनाप यानादीगु दु । म्हिग जक छगू ज्याझ्वलय् नेम्वाङ दलतय्सं थःत अधिकार ब्यूसां थःम्हं गतिरोध क्वचायेकेफुगु धयादीगु खः ।
नापलाय् ज्याय् सभामुख नेम्वाङं माओवादी नायः प्रचण्डया स्वास्थ्य अवस्थाया बारे नं न्यनेकने यानादीगु खः । छुं ई न्ह्यः निसें माओवादी नायः प्रचण्ड बिरामी जुयाः छेँय् हे आराम यानाच्वनादीगु खः ।
