दुई तिहाई बहुमतं संविधान संशोधन यायेफइगु

न्हूगु संविधानय् संघीय व्यवस्थापिकाया दुई तिहाई बहुमतं संविधान संशोधन यायेफइगु विषयलय् दलत दथुइ सहमति जूगु दु ।

संविधानसभाया विवादित विषयत ज्यंकेगु निंतिं निस्वंगु उच्चस्तरी कार्यदलया थौं च्वंगु मुँज्याय् दुई तिहाई बहुमतं संविधान संशोधन यायेपफइगु व्यवस्था न्हूगु संविधानय् तयेत दलतय्सं सहमति जूगु खः ।

मुँज्याय् न्हूगु संविधानय् अपरिर्वतनीय धारा तयेगु वा मतयेगु बारे सहलह जुसां सहमति धाःसा जुइमफुत । माओवादीं संघीयता, गणतन्त्र व सार्वभौमसत्ता बाहेकया धारात हिलेफइगु कथं व्यवस्था यायेमाःगु अडान कयाच्वंगु दु ।

माओवादी नायः पुष्पकमल दाहाल 'प्रचण्ड'या संयोजकत्वय् निस्वंगु कार्यदलया निक्वःगु खुसी थप याःगु म्याद कन्हय् क्वचायेत्यंगु दु ।