पेट्रोलियम पदार्थय् थकाःगु भाः लितकायेत माओवादीया माग
नेपाल आयल निगमं पेट्रोलियम पदार्थय् थकाःगु भाः लितकोयेत एकीकृत नेकपा (माओवादीं) माग याःगु दु ।
माओवादी प्रवक्ता दिनानाथ शर्मां बिहीवाः छगू प्रेस विज्ञप्ति पिथसें अपारदर्शी तरिकां थकाःगु भाः लितकायेत माग यासें भाः लितमकाःसा आन्दोलनय् कुहांवयेगु ख्याच्वः ब्यूगु दु ।
विज्ञप्तिइ आयल निगम दुनेया भ्रष्टाचार व चुहावटया हुनिं इलय् ब्वयलय् जनतायात मूल्यवृद्धिया मार लाकीगु खँ न्ह्यथंसें निगम दुनेया भ्रष्टाचार व चुहावटया छानविन यानाः अपराधीतय्त कारवाही व न्यायोचित मूल्य निर्धारणया निंतिं शक्ति सम्पन्न संसदीय समिति निस्वनेत माग यानातःगु दु ।
पेट्रोलियम पदार्थया भाः अप्वयेवं पारवाहनया भाः नापं केँ, जाकि, चिलगायतया उपभोग्य वस्तुाय भाः नं थहांवनाः न्हिया न्हिथंया जनजीवनय् लिच्वः लाइगु धासें माओवादीं पुलांगु हे भाः कायम यायेत नं माग याःगु दु ।
