भाः थकाःगु विरोधय् प्रमया पुत्ला च्याकल
राष्ट्रिय प्रजातन्त्र पार्टी नेपालं पेट्रोलियम पदार्थय् थकाःगु भाःया विरोधय् थौं प्रधानमन्त्री माधवकुमार नेपालया पुताल च्याकूगु दु ।
भाः थकाःगु विरोधय् म्हिग निसें आन्दोलनय् कुहांवःगु राप्रपा नेपालं थौं देय्या थीथी जिल्लाय् सुथय् ९ बजे निसें घौच्छि चक्काजाम याःगु खःसा न्हिनय् येँय् प्रधानमन्त्रीया पुत्ला च्याकूगु खः । म्हिग राप्रपा नेपालं आयल निगमय् घर्ना ब्यूगु खः ।
अथेहे भाः थकाःगु विरोधय् थनिंनिसें थीथी संघ संस्थात आन्दोलनय् कुहांवःगु दु । उपभोक्ता अधिकार रक्षाया निंतिं उपभोक्ता सञ्जाल, बेरोजगारी युवा संघ, ग्यास विक्रेता महासंघ व अखिल नेपाल वैदेशिक रोजगार पीडित व परामर्श संघया प्रतिनितय्सं थौं आयल निगमय् धर्ना ब्यूगु दु । थीथी संघ संस्थातय्सं थौं निघौ बबरमहल स्थित आयल निगमया ज्याकू न्ह्यने धर्ना च्वंगु खः ।
उखे निन्हु न्ह्यः निसें आन्दोलन यानाच्वंगु विद्यार्थी संगठनतय्सं नं थौं येँया थीथी क्याम्पस न्ह्यने छुं ई विरोध प्रदर्शन याःगु दु । प्रदर्शनया हुनिं चावहीली-गौशाला लगायत थीथी लागाया ट्राफिक व्यवस्था अस्तव्यस्त जूगु खः ।
