विवादित १८गू बुँदाय् सहमित
संवैधानिक समतिलय् विवादित थीथी ९६गू मध्ये १८गू बुँदाय् उच्चस्तरीय कार्यदलं थौं सहमित याःगु दु ।
थौं सुथय् सिंहदरवारय् च्वंगु कार्यदलया मुँज्याय् राष्ट्र व राज्यया परिभाषाय् सहमति जूगु दु । सहमति कथं आः नेपाः बहुजातीय, बहुधार्मिक, बहुसांस्कृतिक, धर्मरिपेक्ष सर्वभौमसत्ता सम्पन्न राज्य जुइ ।
अथेहे प्रदेशय् जनमत संग्रह यायेगु विषयलय् नं सहमित जूगु दु । सहमित कथं प्रदेशय् जनमत संग्रह यायेमाःसा केन्द्रय् सिफारिस यायेमाःगु व केन्द्रया दुईतिहाई बहुमतं अनुमोदन याःसा जनमत संग्रह याये फइगु व्यवस्था याःगु दु ।
उखे राष्ट्रिय ध्वाँय् व संविधान संशोधनया विषलय् धाःसा अझ नं विवाद कायम हे दनी । माओवादीं देय् एकात्मक प्रणालीलय् दुगु इलय् दयेकूगु ध्वाँय् हिलेमाःगु तर्क न्ह्यने हःगु दु । अथेहे माओवादीं संविधानय् अपरिवर्तनीय धारा तःसा संविधानय् जटिलता वइगु धासें अपरिवर्तनीय धारा हे मतयेगु प्रस्ताव याःगु दु ।
माओवादीया थुगु प्रस्तावय् धाःसा मेमेगू दलं असहमति प्वंकावयाच्वंगु दु ।
