सूदया थासय् न्हूम्ह राजदूत वइगु

येँ (सन्ध्या टाइम्स)/नेपाःया राजनीतिइ इलय् ब्यलय् चर्चाय् वयाच्वंम्ह भारतीय राजदूत राकेश सुदयात भारत सरकारं थःगु देशय् लित सःतीगु जूगु दु ।

नेपालय् व्यापक आलोचना जूगुलिं राजदूत सुदयात भारतं थःगु हे देय् लित सःतेत्यंगु खः। भारतया छगू पत्रिकां थौं पिथंगु समाचार कथं वय्कःया थासय् आः भारतीय विदेश मन्त्रालयया विशेष सचिव जयन्त प्रसादयात नियुक्त यायेगु तयारी यानाच्वंगु दु। भारतं पिहां वइगु अंग्रेजी न्हिपौ 'दि टेलीग्राफ'य् धयातः कथं लिपांगु इलय् वयाः नेपाःया अवस्था तसकं चुनौतीपूर्ण जूगु इलय् नं राजदूत सुदं बांलाक भूमिका म्हिते मफुगु व वय्कःया घमण्डी कार्यशैलीया कारणं आलोचना अप्वया वःगुलिं सरकारं लित सःतेत्यंगु खः। उकी वय्कःया कार्यकालय् हे नेपालय् दकलय् अप्वः भारतया आलोजना जूगु व राजनीतिक तहलय् जक मखु सतकय् तकं कुटनीतिक खँ पिहां वःगु खँ नं धयातःगु दु ।

राजदूत सुदयात लित सःतेगु व जयन्त प्रसादयात नियुक्त यायेगु ज्यायात न्हूदिल्लीं नेपाःनाप व अझ खास यानाः माओवादीनाप न्हू कथं स्वापू दयेकेत न्ह्याकूगु कुतः खः धकाः भारतया अधिकारीतय्सं टिप्पणी याना हःगु खँ नं न्हिपती न्ह्यथनातःगु दु ।

नेपाःया माओवादी व भारतया स्वापू स्यंकेगु ज्याय् राजदूत सूदया हे प्रमुख ल्हाः दुगु द्वपं थन बीगु याः। आः वय्कःया थासय् न्हूम्ह राजदूत जुयाः वयेत्यंम्ह जयन्त प्रसाद अफगानिस्तानय् राजदूत जुयाः ज्या यायेधुंकूम्ह खःसा वय्कः नेपालय् हे सन् १९९० ताकाय् राजदूत जुया वंम्ह भाजु विमल प्रसादया काय खः ।