सुरक्षाया माग यासें स्कूल बन्द
येँ (सन्ध्या टाइम्स)/एकीकृत माओवादीलिसे सतीम्ह छम्ह शिक्षकं प्राचार्ययात ल्हाः वाःगुलिं शान्ति सुरक्षाया माग यासें रुकुमया त्रिभुवन जनता उच्च मावि अनिश्चितकाल तकया निंतिं बन्द याःगु दु ।
माओवादी नाप लिक्क लाःगु अखिल नेपाल शिक्षक संगठनय् आवद्ध डिल्लीबहादुर डाँगीं उगु हे स्कूलया प्राचार्य मीनबहादुर पुनयात ल्हाःवाःगु खः। प्राचार्ययात दाःगुलिं सुरक्षाया माग यानाः स्कूलया प्रशासनं थनिंनिसें अनिश्चितकाल तकया निंतिं स्कूल बन्द याःगु खः ।
उगु स्कूलय् दरबन्दी पूर्तिया विषयसं अनियमितता याःगु धकाः माओवादीया शिक्षक डाँगी व अखिल क्रान्तिकारीया विद्यार्थीतय्सं अथे प्राचार्ययात ल्हाः वःगु खः। थ्वहे दथुइ सुचं हे मबिसे चांचां हे थः मनूतय्त नियुक्ति याःगुलिं धकाः अखिल क्रान्तिकारीं नं उगु स्कूल बन्द यायेगु घोषणा याःगु दु। उगु खँयात कयाः अखिल क्रान्तिकारी व मेपिं विद्यार्थीतय् दथुइ छझाः ल्वापु तकं जूगु खः ।
