'भगवान बुद्ध थारूया हे सन्तान खः'

येँ (सन्ध्या टाइम्स)/थ्व हे वइगु माघ ८, ९ व १० गते येँय् जुइत्यंगु विश्व शान्ति महापूजायात गुकथं, सफल यायेगु धइगु बारे थीथी जाति, समुदायतय् धार्मिक प्रतिनिधितय् दथुइ छगू अन्तर्क्रिया ज्याझ्वः जुल। हिमाली आदिवासी महासंघया नायः सकुन शेरचनया सभापतित्वय् जूगु उगु ज्याझ्वलय् थीथी ख्यःया व्यक्तित्वपिं लिसें थीथी बौद्ध विद्वानतय्सं न्ववानादीगु खः ।

ज्याझ्वलय् न्ववासें धर्मोदय सभाया दांभरिं रत्नमान शाक्यं थुज्वःगु धार्मिक ज्याझ्वलं बौद्धत छधी जुइत मू भूमिका म्हिती धयादिल। विद्वान लोकबहादुर शाक्यं न्हापाया अनुभवत कँसें नेपाः न्ह्याथे यानाः नं धर्म निरपेक्ष देय् जुइमाः धकाः बः बियादिल। वय्कलं बौद्धत थाय् व परम्पराया आधारय् न्ह्यागु हे सम्प्रदाय व समुहय् च्वंसां भगवान् बुद्धया पञ्चशीलंनिसें निर्वाण तकया सिद्धान्त छगू हे जूगु कारणं थ्व शान्ति पूजां बौद्धतय्त अझ छधी याइगु विश्वास प्वंकादिल। नेपाली सेनाया पुलांम्ह रथी जर्नेल दिपक गुरुङं ३५ दँ न्ह्यः सेनाय् भर्ती जूबलय् बौद्ध जूसां हिन्दू च्वयेत बाध्य जुइमाल धासें बुद्ध भारतय् जन्मे जूगु धइगु हल्ला जूसां नं राष्ट्रिय संचार माध्यमत सुम्क च्वनाच्वंगु द्वपं बियादिल। बुद्धया जन्मस्थल नेपाः खः धकाः सीके बीत पर्यटकतय्त लक्षित यानाः लुम्बिनीइ हरेक छगू छगू किलोमिटर पाक्क बुद्ध नेपालय् जन्मे जूगु खः धकाः च्वयातःगु बोर्ड तयेमाःगु व थज्याःगु बोर्ड स्वनिगःया पर्यटकीय लागाय् नं तयेमाःगु सुझाव बियादिल ।

अथे हे सभासद् रुकमिनी चौधरीं भगवान् बुद्धया मां थारुया म्ह्याय्मचा खः धइगु दसि न्ह्यब्वयादिल। थारु समुदायय् न्हापांम्ह सन्तान थःछेँय् वनाः बुइके माःगु चलन दुगु व उकिया लागिं साल सिमाया हः मदयेक मगाःगुलिं भगवान बुद्धया जन्मलिसे थुगु तथ्य मिले जूगु कारणं भगवान बुद्ध थारूतय् सन्तान खः धकाः दावी यानादिल। वय्कलं धयादिल, 'लिपा थीथी कारणं यानाः थारूत मेगु धर्मय् वन तर आः थारूत जागृत जुइधुंकूगु दु ।'

उगु अन्तर्क्रियाय् सछिम्ह स्वयां अप्वः सहभागीतय्सं ब्वति काःगु खः ।