कसाः तःधं गुथिया न्हूगु ज्यासना पुचः
येँ (सन्ध्या टाइम्स)/वंगु शनिवाः जूगु कसाः तःधं गुथिया तःमुँज्याय् भाजु स्वयम्भूवीर सिं कसाःया पुचः स्वदँया निंतिं निर्वाचित जूगु दु ।
कसाः तःधं गुथिया इतिहासय् हे दकलय् न्हापांखुसी थुगुसी गोप्य मतदान यानाः ज्यासना पुचः ल्ययेगु ज्या जूगु खः। निर्वाचन पुचलं घोषणा याःकथं नायः स्वयम्भूवीर सिं कसाः, न्वकु जगतरत्न कसाः, छ्याञ्जे देवकृष्ण कसाः व दांभरि रत्नसागर कसाः प्यम्हं छगू हे प्यानलया उमेदवारत त्याःगु खः ।
गुथिया विधानकथं ज्यासना पुचलय् प्यंगू मू पद निर्वाचनपाखें ल्यइगु खःसा कसाःतय्गु खुगू कवःपाखें खुम्ह कवः प्रतिनिधिकथं निर्वाचित प्यम्ह पदाधिकारीपिनि सहमतिइ ल्यइगु चलन दु। मुँज्याय् गुथिया थीथी ज्याखँ व निर्वाचनया विषयय् डा. रुप ज्योति, डा. तेजरत्न, डा. विद्यावीर सिं, हितकरवीर सिं, पुष्प ज्योतिपिंसं थःथःगु नुगःखँ प्वंकादीगु खः।
ज्यासना पुचःया पुलांम्ह नायः शरदवीर कसाःया सभापतित्वय् न्ह्याःगु उगु मुँज्याय् पुलांम्ह छ्याञ्जे उदयरत्नं दछिया रिपोर्ट पेश यानादीगु खःसा दांभरि यज्ञरत्नं आर्थिक प्रतिवेदन न्ह्यब्वयादीगु खः ।
