नेपालभाषाय् न्हूगु सम्मान
साहित्य व स्वास्थ्य क्षेत्रय् सेवा याइपिनि हनाय् नेपालभाषाया च्वमि व शिक्षाविद् लक्ष्मण राजवंशीं थः अबु बुद्धिबहादुर व मां पूर्णकुमारीया नामं 'बुद्धि-पूर्ण सम्मान गुथि' स्वनादीगु दु ।
उगु सम्मानया निंतिं आःयात थम्हं न्यागू लाख तकाया छगू अक्षयकोष स्वनेगु व लिपा थः काय म्ह्याय्पिंसं उकी मेगु दां तना यंकीगु जानकारी नं वय्कलं बियादिल ।
बाखं दबूया ग्वसालय् भाजु राजवंशीया छेँय् जूगु बाखं गोष्ठीइ ब्वति काःपिंत लसकुस यायेगु झ्वलय् वय्कलं उगु घोषणा यानादीगु खः ।
समालोचक चित्तराजन नेपाली मू पाहां कथं झाःगु उगु ज्याझ्वलय् सरस्वती तुलाधर, सुजिता माःजु, मिना बज्राचार्य, बिमला शाक्य, मोहिनी चित्रकार, गम्भीरमान माय्केँ, लक्ष्मण राजवंशी, श्याम 'आशा', सुधीर 'ख्वबी', विमल ताम्रकार, दया 'बैचेन', मथुरा साय्मि, सौरभ शाक्य, अनुप सिं सुवाल, शरद कसाः, कृष्णभक्त बोडे व नारद बज्राचार्यं बाखं ब्वनादीगु खः । ज्याझ्वः रामशेखर नकःमिया सभापतित्वय् न्ह्याःगु खः ।
