अखिलय् निगू पक्ष दथुइ ल्वापु, न्वकू सहित न्हय्म्ह घाःपाः
नेकपा (एमाले) समर्थित विद्यार्थी संगठन अनेरास्ववियुया निगू पक्षय् दथुइ थौं संगठनया ज्याकूथी ल्वापु जूगु दु । जनकपुरय् जूगु २०गू महाधिवेशन पाखें एमाले नायः झलनाथ खनाल व नेता केपी शर्मा ओली पक्षय् विभाजित जूगु निगू पक्षय् दथुइ ल्वापु जूगु खः ।
अनेरास्ववियुया थौं च्वंगु मुँज्याय् ओली पक्षधर नायः माधव दुङ्गेल व मू छ्याञ्जे किशोरविक्रम मल्लं एकपक्षिय ढंगं राजनीतिक प्रतिवेदन न्ह्यब्वयेत स्वःगुलिं ल्वापु जूगु द्वपं खनाल पक्षधरया विद्यार्थी नेतातय्सं ब्यूगु दु । उखे ओली पक्ष याःपिंसं धाःसा खनाल पक्षं थःगु राजनीतिक प्रतिवेदन पारित यायेमफुगु हुनिं थःपिंत गुण्डा हयाः आक्रमण याःगु द्वपं ब्यूगु दु ।
राजनीतिक प्रतिवेदन न्ह्यब्वयेगु ज्या जुइवं असन्तुष्ट खनाल पक्षधरयापिंसं ज्याकूथी दुगु मेचं क्येकूगु खः । उगु घटनाय् लानाः न्वकू नविना लामा सहित न्हय्म्ह घाःपाः जूगु दु ।
