राप्रपा नेपालपाखें आयल निगमया ज्याकू घेराउ
येँ (सन्ध्या टाइम्स)/नेपाल आयल निगमं पेट्रोलियम पदार्थय् भाः थकाःगु विरुद्ध राष्ट्रिय प्रजातन्त्र पार्टी नेपालं थौं आयल निगमया केन्द्रीय ज्याकू बबरमहलय् घेराउ याःगु दु ।
उगु पार्टीया नायः कमल थापाया नेतृत्वय् आयल निगमया ज्याकुथी थौं सुथय् ९ बजेनिसें २ घण्टा तक घेराउ याःगु खः। राप्रपा नेपालया स्वनिगःया थाय् थासय् च्वंपिं कार्यकर्तातय्सं घेराउया झ्वलय् पेट्रोलियम पदार्थय् थकाःगु भाः तत्काल लित कायेमाःगु धकाः नारा थ्वयेकेगु नापं नेतातय्सं भाषण नं बिउगु खः ।
उगु पार्टीया नेता कार्यकर्तातय्सं घेराउ याःगुलिं निगमया ज्या ११ बजे तक ठप्प जूगु खः। पार्टीया सहमहामन्त्री राजाराम श्रेष्ठं भाः थकाःगु विरुद्ध निरन्तर रुपं देय्न्यंकं आन्दोलन यानाः वनेगु जुइ धकाः धयादीगु दु। वय्कलं गबले तक भाः क्वकाइमखु अबले तक निरन्तर रुपं आयल निगमयात घेराउ यायेगु जुइ धकाः नं धयादिल ।
थ्व हे झ्वलय् नेवाःतय्गु राष्ट्रिय संगठन नेवाः देय् दबूपाखें विज्ञप्ति पिथनाः आयल निगमं थकाःगु पेट्रोलियम पदार्थया भाः तत्काल लित कायेत माग याःगु दु ।
नेपाल आयल निगमं वंगु सोमवाःनिसें लागू जुइगु कथं जा थुइगु ग्यासय् ७५ तका, मचिकं, डिजेल व पेट्रोलय् ३/३ तका भाः थकाःगु खःसा निगमं भाः थकाःगुयात प्यखेरं विरोध याना हयाच्वंगु दु नापं सतकय् प्रदर्शन यायेगु ज्या नं जुयाच्वंगु दु ।
