संसदया अधिवेशन सःतेगु खँय् थौं माओवादी व एमालेया वार्ता
येँ (सन्ध्या टाइम्स)/व्यवस्थापिका संसदया अधिवेशन सःतेगु खँय् एकीकृत माओवादी व एमालेया दथुइ थौं सनिलय् वार्ता याइगु जूगु दु। तःन्हु न्ह्यवंनिसें संसदया अधिवेशन सःतके बीगु नितिं अभियानया रुपय् थीथी दलया नेतातलिसे सहलह ब्याका वयाच्वंगु खः। थ्व हे झ्वलय् एमालेया नेतातय्सं थौं सनिलय् वार्ता यायेगु जुइ धकाः माओवादीया नेतातय्त ई बिउगु दु ।
माओवादीं तत्काल हे संसदया अधिवेशन सःतेत माग याना वयाच्वंगु व उकियात कयाः चिचीधंगु च्यागू दललिसे नं सहलह ब्याका वयाच्वंगु खः। थौं नं माओवादीया संसदीय दलया ज्याकू सिंहदरवारय् माओवादीं च्यागू दलया नेतातलिसे सहलह ब्याकूगु दु ।
माओवादीं तत्काल संसदया अधिवेशन मसःतल धाःसा विशेष अधिवेशनया नितिं समावेदन दर्ता यायेगु धकाः थःगु पार्टीया निसःम्हं मल्याक सांसदतय्गु ल्हाःचिं तकं मुंकातये धुंकूगु दु ।
