प्रमयात नागरिक समाजया सुझाव
नागरिक सर्वोच्चता कायम यायेगु निंतिं गुगुं नं हालतय् प्रधानसेनापति रुक्मांगद कटवालयात चीकेगु खँ प्रधानमन्त्री पुष्पकमल दाहाल 'प्रचण्डं' धयादीगु दु ।
थौं सुथय् थःत नापलाः वःपिं नागरिक समाजया न्ह्यलुवाःतलिसे खँ ल्हासें वय्कलं उगु खँ कनादीगु खः ।
जनताया सर्वोच्चता कायम यायेगु निंतिं सरकारं निर्णय याःसां नं राजनीतिक पार्टीतय्सं अनावश्यक विवाद पिकयाच्वंगु द्वपं नं वय्कलं बियादिल । प्रधानसेनापति प्रकरणया कारणं सरकारं महत्वपूर्ण ज्या याये मफयाच्वंगु खँ कनादिसें वय्कलं नेपाली कांग्रेसया सभापति गिरिजा प्रसाद कोइराला नं सेनापति चीकेगु सवालय् लचिलो जूगु जानकारी बियादिल ।
नागरिक समाजया प्रतिनिधितय्सं सेनापति सम्बन्धय् सरकारं गुगुं नं कथंया सम्झौता मयायेत प्रम प्रचण्डयात सुझाव बिउगु दु । सरकारं याइगु निर्णय विवेकपूर्ण जुइमाः धासें नागरिक समाजं सेनापतियात चीकेमाःगु सुझाव नं बिउगु दु ।
लिसें नागरिक समाजं शान्ति प्रकि्रया अवरुद्ध जुयाच्वंगुलिं संविधान च्वयेगु ज्याय् तकं लिच्वः लानाच्वंगु खँ धासें सेनापति प्रकरण याकनं ज्यंकेमाःगु सुझाव नं बिउगु दु ।
