'छुं नं हालतय् भाः थकायेगु निर्णय लितकाये फैमखु'
नेपाल आयाल निगमया महाप्रवन्धक दिगम्बर झां पेट्रोलियम पदार्थय् भाः थाकेमाःगु बाध्यता जूगु दाबी यासें छुं नं हालतय् उगु निर्णय लितमकायेगु खँ धयादीगु दु ।
येँय् थौं जूगु छगू साक्षात्कार ज्याझ्वलय् महाप्रबन्धक झां भाः थकायेमाःगु निगमया बाध्याता थुइकाबीत फुक्कसित इनाप यासें यदि निगमयात सरकारं लाःया पीगू करोड अनुदान ब्यूसाः मूल्यबुद्धि तत्काल लितकायेफैगु धयादिल ।
ज्याझ्वलय् उपभोक्ता हित संरक्षण मञ्चया मूछ्याञ्जे ज्योति बानियां आःया मूल्यबृद्धि अपारदर्शी व अनुचित जूगु धासें थुकीं निगम व डिपोयात नाफा जुइगु व सर्वसाधारण मारय् लाइगु धयादिल ।
अथेहे ज्याझ्वलय् युवा संघ नेपालया नायः महेश बस्नेत, अखिल (क्रान्तिकारी)या नायः लेखनाथ न्यौपाने, नेपाल विद्यार्थी संघया न्वकू नैनिसंह महर लगायतं विद्यार्थीत सतकय् कुहांवयेधुंकूगु धासें आयल निगमयात थःगु निर्णय लितकायेत बाध्य यायेगु बिचाः प्वंकूगु खः । इमिसं पेट्रोलियम पदार्थया थकाःगु भाः लितमकायेकं थःपिनिगु आन्दोलन मदीगु ख्याच्वः तकं ब्यूगु खः ।
