माओवादी सहित गुंगू दल संसद अधिवेश सःतेत सहमत
एकीकृत नेकपा (माओवादी) व चिधंगु गुंगू दलत दथुइ संसद्या विशेष अधिकार छ्यलेगु कथं संसद् अधिवेशन सःतेत सैद्धान्तिक सहमति जूगु दु ।
सिंहदरवारस्थित माओवादी संविधानसभा दलया ज्याकूथी थौं च्वंगु मुँज्याय् सरकारं सांसद्या अधिकारयात हाजांगाया एकतर्फी रुपं संसद् अधिवेशन अन्त्य याःगु धासें सांसद्या विशेष अधिकार छ्यलाः अधिवेशन सःतेगु सैद्धान्तिक सहमति याःगु खः ।
संसद् अधिवेशन सःतेत सहमत जुसां नं चिधंगु दलतय्सं माओवादीं संसद् अधिवेशन सःतेगु उद्धेश्य स्पष्ट यायेमाःगु बिचाः प्वंकूगु खः । माओवादी व चिधंगु दलं सर्वोच्च अदालतं प्रधानमन्त्रीया निंतिं जुयाच्वंगु निश्कर्षविहीन चुनाव मयायेत आदेश बीवं सरकारं कामचलाउ आयु अप्वयेकेत संसद्या अधिवेशन क्वचायेकूगु द्वपं तकं ब्यूग दु ।
संसद्या कूल ल्याः मध्ये नीन्यागू प्रतिशतं राष्ट्रपति समक्ष समावेदन याःसा राष्ट्रपितं झिंन्यान्हु दुने संसद् अधिवेशन सःतेमाःगु व्यवस्था दु ।
