भाः थकाःगु विरोधय् थौं नं प्रदर्शन
पेट्रोलियम पदार्थय् भाः थकाःगु विरोधय् थौं नं येँया थीथी थासय् विद्यार्थीतय्सं सुथंनिसें प्रदर्शन याःगु दु ।
भाः थकाःगु तत्काल लितकायेमाःगु माग यासें विद्यार्थीतय्सं राजधानीया त्रि-चन्द्र नापं छुंछुं क्याम्पस न्ह्यने प्रदर्शन यायेवं राजधानीया ट्राफीक व्यवस्थापनय् छुं ईया निंतिं समस्या जूगु खः ।
विद्यार्थीतय्सं म्हिग याःगु प्रदर्शनया झ्वलय् प्रहरीं हस्तक्षेप याःगु व थः पासापिंत घाःपाः यानाब्यूगु धासें थौं नं थीथी क्याम्पस न्ह्यने प्रदर्शन याःगु खः । विद्यार्थी आन्दोलनया हुनिं येँया थीथी थासय् स्नातक तह निगूगु दँया थौंया जाँच लिछ्याःगु दु ।
थ्वहे दथुइ आयल निगमं भाः थकाःगु विरोधय् राष्ट्रिय प्रजातन्त्र पार्टी नेपालं ब्यूगु धर्ना व प्रदर्शनय् प्रहरीं हस्तक्षेप याःगु दु । आयल निगमया बबरमहलस्थित केन्द्रिय ज्याकू न्ह्यने धर्नाय् च्वंपिं राप्रपा नेपाल कार्यकर्तातय्सं आयल निगमया होर्डीङ् वोर्डय् लाकांया माः तयेत स्वयेवं प्रहरीं हस्तक्षेप याःगु खः ।
प्रहरी हस्तक्षेप लिपा छुं ई निगम व नापसंया क्षेत्र तनावग्रस्त जूगु खः । राप्रपा नेपालं कामचलाउ सरकारं अधिकार क्षेत्र पिने वनाः जनतायात मारय् लाकेगु कथंया निर्णय याःगु धासें तत्काल निर्णय लितकायेत माग याःगु दु ।
