'जनयुद्ध' व्याख्यात्मक टिप्पणी कथं न्ह्यथनीगु
न्हूगु संविधानय् माओवादीं न्ह्याकूगु झिंदँतकया सशस्त्र द्वन्द्वयात जनयुद्ध कथं न्ह्यथनीगु जूगु दु । संविधानसभाय् खनेदुगु विवाद ज्यंकेत निस्वंगु उच्चस्तरीय राजनीतिक संयन्त्रया थौं च्वंगु मुँज्यां जनयुद्ध खँग्वयात न्हूगु संविधानय् व्याख्यात्मक टिप्पणीया कथं न्ह्यथनेगु सहमति याःगु खः ।
थ्वस्वयां न्ह्यः मस्यौदा निर्माणया झ्वलय् जनयुद्ध खँग्वःया संवैधानिक समितिं अस्वीकृत यःगु खःसां माओवादीं जनयुद्ध हे न्ह्यथने माःगु अडान मत्वतेवं उकीयात व्याख्यात्मक टिप्पणीया कथं न्ह्यथनेगु सहमति याःगु खः ।
तर जनयुद्धया न्ह्यने छु उल्लेख यायेगु बारे धाःसा अझ नं सहमति जुइमफुनी । माओवादीं ऐतिहासिक जनयुद्ध न्ह्यथनेमाःगु दाबी यानाच्वंगु दुसाः कांग्रेस व एमालें उकी असहमति प्वंकाच्वंगु दु ।
अथेहे सिंहदरवारय् थौं च्वंगु मुँज्याय् बहुलवाद, बहुभाषी-जाति धइगु खँग्व तयेगु विषयलय् नं सहलह जुसां सहमति जुइमफुत । अथेहे आत्मनिर्णयाया अधिकारया बारे नं मुँज्याय् सहलह जूगु खः । माओवादीं संघीय राज्ययात आत्मनिर्णयया अधिकार बीमाःगु धाःगु दुसाः मेमेगू दलं आत्मनिर्णयया अधिकारया परिभाषा यानाः जक क्वःछिमाःगु अडान कयाच्वंगु दु ।
