विशेष अधिवेशन सःतेत माओवादीं सहलह न्ह्याकल
एकीकृत नेकपा (माओवादीं) विशेष अधिवेशन सःतेत चिधंगु थीथी दलनाप सहलह न्ह्याकूगु दु ।
माओवादीं राजनीतिक गतिरोध चीकेगु निंतिं विशेष अधिवेशन आव्हान यायेमाःगु माग यासें संसदय् दुथ्याःगु १०गू चिधंगु दलतनाप सहलह याःगु खः । माओवादी पदाधिकारीतय् मुँज्यां विशेष अधिवेशन सःतेत पहल यायेत दलतनाप सहलह यायेगु निर्णय याः कथं थौं १०गू दलनाप सहलह याःगु खः ।
सिंहदरवार स्थित माओवादी संसदीय दलया ज्याकूथी जूगु सहलहस सरकारं संसदया अधिवेशन अन्त्य यानाः अध्याधेश मार्फत बजेट हःगु ज्या असंवैधानिक जूगु धासें माओवादीं बजेट, प्रधानमन्त्री चुनाव लगायतया विषय ज्यंकेत विशेष अधिवेशन सःते माःगु खँ न्ह्यथंगु खः ।
मुँज्या लिपा मधेशी जनअधिकार फोरम नेपालया नायः उपेन्द्र यादवं थःपिंसं नियमित अधिवेशन सःतेत पहल यायेत सुझाव बियागु धयादिल ।
मुँज्याय् मधेशी जनअधिकार फोरम नेपाल, नेपाल सद्भावना पार्टी (सरिता गिरी), नेकपा एकीकृत, जनमुक्ति पार्टी, नेकपा (माले) समाजवादी, नेपाः राष्ट्रिय पार्टी लगायत दलया ब्वति दुगु खः ।
