पद्मकन्याय् गृह विज्ञानया एम.ए. कक्षा
नेपाःया पुलांगु मिसा कलेज पद्मकन्या क्याम्पसय् आः वइगु शैक्षिक सत्रंनिसें गृह विज्ञान अन्तर्गत एम.ए. तहया निगू विषय थप यानाः ब्वंकीगु जूगु दु । त्रिभुवन विश्वविद्यालय गृहविज्ञान केन्द्रीय विभागपाखें म्हिगः पद्मकन्या कलेजय् याःगु पत्रकार सम्मेलनय् नसा ज्वलं ज्वरे यायेगु छगू न्हूगु विषय व मचा बिचाः यायेगु व लैंगिक अधिकारया विषयय् कयाः निगू विषयय् एम.ए. तक ब्वने दइगु बन्दोबस्त यानागु जानकारी बिउगु खः ।
न्ह्यागु जूसां छगू विषयय् बी।ए। क्वचायेकातःपिं मिसा विद्यार्थीतय्सं जक १००० मार्कया थुगु गृह विज्ञान अन्तर्गतया खाद्य व बाल विकास तथा लैंगिक अधिकार विषयय् कयाः ब्वने दइगु प्रवन्ध मिले यानातःगु दु । पत्रकार सम्मेलनय् विभागया सह प्रमुख प्रा. डा. चन्द्रा भद्रां लैंगिक समानता व मिसा विरुद्धया हिंसा अप्वया वनाच्वंगु खँयात ध्यानय् तयाः थुगु विषयय् ब्वंकेगु ब्यवस्था यानागु जानाकारी बियादिल ।
अथे हे शिक्षक संगठनया रमेश श्रेष्ठं ५५ दँ न्ह्यवंनिसें नारी शिक्षाय् सनाच्वंगु थुगु क्याम्पसपाखें आःयात नीम्ह स्वीम्ह जक जूसां थुगु विषयया विद्यार्थी तयार यायेगु कथं थुगु न्हूगु विषय ब्वंकेत्यनागु जानकारी बियादिल । आःयात पद्म कन्या छगुली जक थुकिया पढाई जुइ ।
परियति ब्वनीपिंत सफू देछा स्वयम्भू पासा पुचःया ग्वसालय् परियत्ति शिक्षा ब्वनाच्वंपिं थः विद्यार्थीपिंत सफू लःल्हात । बुद्धपूजा व धर्मदेशना लिपा जूगु उगु ज्याझ्वलय् भिक्षु बोधिसेन महास्थविरं सफू व दां लःल्हानाबिज्याःगु खः । धर्म पासा पुचःया नायः पुष्परत्न तुलाधर नाप मेमेपिं दातापिंसं उगु सफू दान बियादीगु खः । ज्याझ्वलय् प्रकाश तुलाधर, रमेश मानन्धर, पुष्पमान डंगोल व बुद्धरत्न मानन्धरिपंसं न्ववानादीगु खः ।
