'जनविद्रोह व सत्ता कब्जा हास्यास्पद खँ'
येँ (सन्ध्या टाइम्स)/ नेपाली कांग्रेसया वरिष्ठ नेता शेरबहादुर देउवां एकीकृत माओवादीया नेतातय्सं जन विद्रोह व सत्ता कब्जा यायेगु धकाः पित हयाच्वंगु खँ हास्यास्पद खः धयादीगु दु। नेपाल प्रेस युनियन चितवनं थौं सुथय् नारायणगढय् याःगु पत्रकार सम्मेलनय् न्ववासें वय्कलं थ्व खँ धयादीगु खः ।
वय्कलं आः नेपाः लोकतान्त्रिक मुलुक जुइधुंकूगु अवस्थाय् थन सत्ता कब्जा व विद्रोह सम्भव जुइ मखु धकाः नं स्पष्ट यानादिल। 'एकीकृत माओवादीं जनविद्रोह व सत्ता कब्जाया खँ हयाच्वंगु हास्यास्पद खः' नेता देउवां धयादिल, 'लोकतान्त्रिक मुलुकय् थ्व खँ सम्भव मदु।' वय्कलं माओवादीयात ल्वाभःया दम्भ त्वःतेत सुझाव नं बियादिल ।
शान्ति प्रकृया व संविधान च्वयेगु ज्या सहमतिपाखें जक सम्भव जुइ धासें वय्कलं शान्ति प्रकृया व संविधान च्वयेगु जटिल ज्या जूगुलिं लिबानाच्वंगु खः उकियात अन्यथा काये मजिउ धकाः नं धयादिल ।
एकीकृत माओवादीं संसदया विशेष अधिवेशन सःतकेगु निंतिं यानाच्वंगु कुतःयात कयाः वय्कलं आःया अवस्थाय् विशेष अधिवेशनसिबें सहमतिया आधारय् हे न्ह्याः वनेमाः धयादिल। नेता देउवां फुक्क हे दलय् विवाद जुइगु सामन्य खँ खः धयादिसें आः शीर्ष नेतातय्सं हे विवाद ज्यंकेमाः धकाः नं धयादिल ।
