१४ गते संविधान वइ मखु: कावा प्रम
येँ (सन्ध्या टाइम्स)/ नागरिक समाजया न्ह्यलुवातय्सं संविधानसभाय् तःधंगु दलतय्गु पहः स्वयेबलय् आः नं क्वःछिनातःगु इलय् संविधान वइगु सभावना मदु धयाच्वंगु इलय् हे कामचलाउ सरकारया कार्यवाहक प्रधानमन्त्री जुयाच्वंम्ह उपप्रधानमन्त्री विजयकुमार गच्छेदारं ला झन आः वइगु जेष्ठ १४ गते न्हूगु संविधान वइ मखु धकाः 'ठोकुवा' हे यानादीगु दु ।
महोत्तरीया औरही लागाय् थौं सुथय् संचारकर्मीतलिसे खँल्हासें भाजु गच्छेदारं थ्व घोषणा यानादीगु खः। वय्कलं संविधानसभाया मू मू स्वंगू राजनीतिक दलत सत्ताया खेलय् वनाच्वंगुलिं क्वःछिनातःगु इलय् न्हूगु संविधान वइ मखु धयादीगु खः ।
वय्कलं धयादिल 'पार्टीत सत्ताया खेलय् लगे जूगुलिं जेष्ठ १४ गते न्हूगु संविधान वइ मखु।' मधेशी जनअधिकार फोरम लोकतान्त्रिकया नायः नं जुयादीम्ह वय्कलं गबलय् तक ल्वाभः त्वःती मखु अबलय् तक माओवादीया सरकार स्वीकार याये फइ मखु धकाः नं धयादिल। 'एकीकृत माओवादी ल्वाभः सहित सत्ताय् वनेगु कुतः यानाच्वंगु दु' गच्छेदारं धयादिल, 'थ्व गुगुं हालतय् नं संभव जुइ मखु ।'
