धर्मोदय सभाया बृहत्त बौद्ध सभा
नेपाःया थीथी बौद्ध संघ संस्थातय्गु कुसा संगठन धर्मोदय सभाया ग्वसालय् थ्वहे वइगु सनिवाः २५५३ क्वःगु बुद्ध जयन्तीया लसताय् 'धर्मोदय-बृहत्त बौद्ध सभा' याइगु जूगु दु । स्वांयाः पुन्हिया लसताय् सभामुख सुभाष नेम्वाङ मू पाहां कथं उगु सभाय् झाइगु खँ ग्वसाः खलकं कंगु दु ।
धर्मोदय सभाया थीथी ज्याझ्वः बारे जानकारी बीगु ल्याखं जुइत्यंगु उगु बृहत्त सभाय् धर्मोदय सभाया उपाध्यक्ष पद्मज्योितं धर्मोदय सभाया धारणा न्ह्यब्वयादी । अथेहे महासचिव सुचित्रमान शाक्यं धर्मोदय सभां न्हूगु संविधानय् तयेमाःगु सुझाव बारे न्ह्यब्वयादीगु खँ नं धाःगु दु ।
सभाय् धर्मोदय सभाया उपाध्यक्ष व पुलांम्ह कानून मन्त्री इन्द्रबहादुर गुरुङं धर्मोदय सभापाखें न्हूगु संविधानय् दुथ्याकेमाःगु थीथी पक्षयात कयाः ध्वाथुइकादी । धर्मोदय सभां संविधानय् हे धर्म निरपेक्ष राज्य धइगु च्वकाः देशय् फुक्कं धर्म माने याये दइगु ब्यवस्था यायेत सुझाव बियातःगु दु ।
वइगु बैशाख २६ गते विश्व न्यंकं बिदा बियाः २५५३ क्वःगु बुद्ध जयन्ती हनेत्यंगु दु । बुद्ध जयन्ती कुन्हु जुइगु शोभायात्रा व अस्थिधातु ब्वज्या नापं थीथी समारोहयात पंगः मवइ कथं धर्मोदय सभां छवाः न्ह्यः हे थुगु सभा यायेत्यंगु खँ धर्मोदयया दुजः सागरमान बज्राचार्यं कनादिल । थुगु विशेष ज्याझ्वलय् धर्मोदय सभा स्थापना कालंनिसें थःगु जिवंकाछि हे योगदान यानाः देश विदेशय् तकं बुद्ध धर्म प्रचार प्रसार यायेगु ज्याय् सकि्रय योगदान याना वयाच्वंपिं लोकदर्शन बज्राचार्य भिक्षु कुमार काश्यप महास्थविर नापं थीथी न्याम्ह व्यक्तित्वपिंत सार्वजनिक अभिनन्दन याइगु ज्याझ्वः नं दयेकातःगु दु ।
