पेट्रोलियम पदार्थय् भाः थकागु विरोधय् प्रर्दशन, छगः सरकारी गाडी च्याकाबिल
नेपाल आयल निगमं पेट्रोलियम पदार्थय् भाः थकागु विरोध थौं विद्यार्थीतय्सं येँय्या थीथी थासय् प्रदर्शन याःगु दु ।
प्रदर्शनया झ्वलय् येँय् चाबहिली आक्रोशित विद्यार्थीतय्सं छगः सरकारी गाडी मि च्याकाः ब्यूगु दु । विद्यार्थीतय्सं च्याकाब्यूगु ज. १. झ. ३४१ नम्बरया सरकारी गडी पूर्णरुपं क्षतिग्रस्त जूगु दु । गाडिइ मि तःगु बाघौ लिपा जक दमकल वयाः मि नियन्त्रणय् काःगु खः ।
थ्वहे दथुइ विद्यार्थीतय् प्रदर्शनया हुनिं चाबहिली क्षेत्र तनावग्रस्त जूगु दु । अन विद्यार्थी व प्रहरी दथुइ ल्वापु तकं जूगु दु । विद्यार्थीतय्सं प्रहरीं अनावश्यक बल छ्यलाः थः पासापिंत घाःपाः यानाब्यूगु द्वपं ब्यूगु दुसाः विद्यार्थीतय्सं क्याम्पसं अप्पां क्येकूगुलि बल छ्यःगु खँ प्रहरीं धाःगु दु । प्रहरीं ८म्ह विद्यार्थीतय्त ज्वना यंकूगु नं सीदुगु दु ।
तनावया दथुइ चाबहिली क्षेत्रया सवारी आवागमन ठप्प जूगु दु । अन विद्यार्थीतय्सं पेट्रोलियम पदार्थय् थकागु भाः लितकायेमाःगु माग यानाच्वंगु दु । आयल निगमं म्हिग पेट्रोल, डिजेल व मचिकंलय् प्रतिलिटर ३/३ तका अप्वयेकूगु खःसा एलपी ग्यास प्रतिसिलिण्डरय् ७५ तका अप्वयेकूगु खः ।
