पौडेलयात हे प्रम दयेकेगु माओवादीया प्रस्ताव
येँ (सन्ध्या टाइम्स)/एनेकपा (माओवादी)पाखें राजनीतिक गतिरोध अन्त्यया नितिं नेपाली कांग्रेसया नेता रामचन्द्र पौडेलयात हे प्रधानमन्त्री दयेकेगु धकाः प्रस्ताव तःगु खुलासा जूगु दु। माओवादी प्रवक्ता दिनानाथ शर्मां थौं सुथय् तिनि थ्व गोप्य खँ सार्वजनिक यानादीगु खः।
माओवादीं आः तक थःगु हे पार्टीया नेतृत्वय् सरकार दयेकेमाः धकाः अडान कया वयाच्वंगु खः ।
क्रान्तिकारी पत्रकार संघ धादिङं थौं सुथय् धादिङबेसीइ याःगु पत्रकार सम्मेलनय् न्ववासें प्रवक्ता शर्मां धयादिल, 'रामचन्द्र पौडेलयात हे प्रधानमन्त्रीइ मतदान यानाः देशयात निकास बीत इनाप यानागु खः तर उकी एमाले माने मजुल। जिपिं प्रतिपक्षय् हे च्वनेत तयार दुगु अवस्थाय् नं एमालें देशयात निकास बीगु कुतः मयात।'
आःया अवस्थाय् एमालेपाखें कामचलाउ सरकारयात हे निरन्तरता बियाः ताः ई न्ह्याः वनेगु नापं देशयात अनिर्णयया बन्दी याना तयेगु कुतः जुयाच्वंगु खँ नं वय्कलं कनादिल। देशय् शान्ति प्रक्रियाया ज्या न्ह्यानाच्वंगु इलय् हे एमालेया शीर्ष नेतात विदेश भ्रमणय् वनाच्वंगुलिं पंगः वःगु दु धासें शर्मां धयादिल 'राष्ट्रपति व सभामुखं विदेश मवनेत इनाप यायेक यायेकं नं एमालेया स्वम्हं हे शीर्ष नेतात विदेश भ्रमणय् वंगु धइगु एमाले शान्ति प्रक्रियाप्रति प्रतिबद्ध मजूगु पुष्टि जूगु दु ।'
वय्कलं एमाले नेतात विदेश वंगुलिं सहलह ब्याके मखनाः मेपिं नेतात बेरोजगार थें जुयाच्वंगुलिं जनतायात सकारात्मक सन्देश वनाच्वंगु मदु धयादिल। नेता शर्मां भारतं छु धाल वहे स्वीकार यानाः सरकारय् वनेगु पक्षय् थःपिं मदु धकाः नं धयादिल ।
