उपराष्ट्रपतियात हे संविधान वइगु विश्वास मदु
येँ (सन्ध्या टाइम्स)/संविधानसभाया म्याद दछि थप यानाः नं न्हूगु संविधान दयेके फइगु अवस्था मदु धकाः थीथी ख्यःया मनूतय्सं चिउताः प्वंका हयाच्वंगु इलय् स्वयम उपराष्ट्रपति परमानन्द झां नं संविधान इलय् वइ धकाः थःत नं विश्वास मदुगु खँ कनादीगु दु ।
उपराष्ट्रपति झां थौं इलामय् स्थानीय संचारकर्मीतलिसे खँल्हासें संविधान इलय् हे वइगु खँय् थज्याःगु आशंका प्वंकादीगु खः। वय्कलं धयादिल 'निदँत्याया दुने मजूगु ज्या आः ल्यं दनिगु खुलाया दुने याये फइगु अवस्था हे मदु।' उपराष्ट्रपति झां धयादिल 'ज्या मयासे ल्वाना जक च्वनीपिं राजनीतिक दलतय्सं इलय् संविधान दयेकी धकाः गय् पत्याः यायेगु?'
राजनीतिक दलत वंगु निदँत्या तक ज्या मयासे ल्वा जक ल्वानाच्वंगु खँ वय्कलं प्वंकादिल। मेगु प्रसंगय् वय्कलं आःया अवस्थाय् नेपालय् राष्ट्रपति शासन लागू जुइ मखु धकाः नं स्पष्ट यानादिल ।
