सेन्ट जेभियस्रय् अभिभावकतय् धर्ना

५० दँ न्ह्यवंनिसें निर्वाध रुपं चले जुया वयाच्वंगु सेन्ट जेभियस्र स्कूलय् निला तक पठनपाठन हे बन्द यानाः माओवादी समर्थित क्रान्तिकारी शिक्षक संघं विद्यालयय् याःगु हस्तक्षेपया विरुद्ध उगु विद्यालयया अभिभावकत जानाः विद्यालयया न्ह्यःने धर्ना च्वंगु दु । मंगलवाः उकथं धर्ना च्वनाच्वंगु इलय् विद्यालयय् तालं ग्वयेत वःम्ह माओवादी समर्थित क्रान्तिकारी शिक्षँक संघ ुइस्टुया छम्ह जिम्मेवार नेतायात प्रहरीं लितुमतु लिनाः गल्लिइ बिसिउँ वनाच्वंम्हेसित हे अभिभावकतय् कुतलय् ज्वनाः पुल्चोक प्रहरी चौकीइ लःल्हाना बिउगु दु ।

माओवादी समर्थित क्रान्तिकारी शिक्षक संघ 'इस्ट'या शाखा नीस्वनाः निला तक अन पठनपाठन बन्द यायेवं परीक्षा हे अन लाः थन लाः मदयाः अन ब्वनीपिं झिंनिसः विद्यार्थीतय् भविष्य हे अनिश्चित जू वनेवं अभिभावकत आन्दोलित जूगु खः । आन्दोलनय् सहभागी अभिभावकतय्सं निर्वाध रुपं विद्यालय साचालन यायेमाःगु व विद्यालयय् पिनेया हस्तक्षेप याये मजिउगु माग यानाच्वंगु दु । विद्यालयया वातावरण स्यंकेत स्वःगु द्वपं बियाः निला न्ह्यः निम्ह शिक्षकयात दछिया थप तलब बियाः बिदा बिउगु खः । तर उकिया विरोधय् निला तक स्कूल बन्द यानाः पिनेया मनूत समेत हयाः हस्तक्षेप याकूगु कारणं अभिभावकत आन्दोलित जूगु खः । प्रिन्सिपल प्राइड जेम्स नापं थीथी इलय् जूगु चरणबद्ध वार्तायात वास्ता मयासे एकतर्फी रुपं निला न्ह्यः तालं ग्वःगु खः । एमाले समर्थित नेपाल राष्ट्रिय शिक्षक संगठन व नेपाली कांग्रेस समर्थित नेपाल शिक्षक संघया प्रतिनिधि व नेपाल विद्यार्थी संघया अध्यक्ष सुन्दर श्रेष्ठ नापं थीथी ब्यक्तित नाप जूगु वार्ताय् विद्यालययात सुचारु यायेगु धकाः निर्णय जुइधुंकाः नं निर्णय माने मयासे 'इस्ट'या शिक्षकत जानाः विद्यालय बन्द यायेत स्वयेवं अभिभावक संघं न्हियान्हिथं विद्यालयया न्ह्यःने धर्ना च्वनेगु शुरु याःगु खः । धर्ना जुयाच्वंगु थासय् हे निष्काशित शिक्षकत नं वयाः उमित तत्काल पुनर्वहाली यायेमाःगु माग यासें विद्यालय चले मयाकेगु धकाः तालं ग्वयेत स्वयेवं सुरक्षा बियाच्वंपिं प्रहरीं हे अःखः क्रान्तिकारी शिक्षक संघया पदाधिकारीतय्त लितुमतु लिनाः ज्वंगु खः ।