ज्याथ नागरिक व याकःमिस्तय्त हना
येँ (सन्ध्या टाइम्स)/जेष्ठ नागरिक समाज समितिया ग्वसालय् शनिवाः छगू ज्याझ्वःया दथुइ ज्याथजिथि नागरिक व याकःमिस्तय्त सम्मान यायेगु ज्या जुल। येँ मनपा १५ वडाया पुलांम्ह वडा अध्यक्ष नापं सामुदायिक विकास समितिया अध्यक्ष इश्वरमान डंगोलया सभापतित्वय् न्ह्याःगु उगु ज्याझ्वलय् मुक्कं २५० म्ह ज्याथजिथि नागरिक व याकःमिस्तय्त हनेगु ज्या जूगु खः। ज्याझ्वलय् समाजया नायः पूर्णमुनी बज्राचार्यं ज्याथपिं नागरिक व याकः मिस्तय्त खादागा क्वखायेकाः, ख्यें सगं बियाः सम्मान यानादीगु खः। सम्मानित सकसितं भोजन याकेगु ज्या नं जूगु खः ।
जेष्ठ नागरिक समाजया दुजः नापं सामुदायिक विकास समितिया न्वकु वरिष्ठ समाजसेवी रत्ननारायण न्हूजवाः साय्मियात नं ६१ दँय् क्यंगु लसताय् अध्यक्ष भाजुं खादागा क्वखायेकाः बुन्हिया भिंतुना बियादीगु खः।
ज्याझ्वलय् ज्याझ्वःया महत्व व विशेषता बारे मूपाहां प्रो. इश्वरीलाल श्रेष्ठ, मेजर भिमबहादुर गुरुङ, रत्ननारायण न्हूजवाः साय्मि, श्रीराम श्रेष्ठपिंसं थःथःगु नुगःखँ तयादीगु खः ।
ज्याझ्वलय् भाजु सुदर्शनमुनी बज्राचार्यं सकल जेष्ठ नागरिकपिं पाखें समाज समितिया नायः पूर्णमुनी बज्राचार्ययात नं अभिनन्दन पौ लःल्हानादीगु खः।
उगु ज्याझ्वलय् मय्जु रचना लामां लसकुस यानादीगु खःसा समितिया नायः पूर्णमुनी बज्राचार्यं सुभाय् बियादीगु खः ।
