थौं नं मालाच्वन तिनि सहमित
प्रधानसेनापति प्रकरणं पिहां वःगु समस्या ज्यंकेगु लागिं ततःधंगु राजनीतिक पार्टीतय् दथुइ थौं नं पहल जुयाच्वंगु दु । उकिया निंतिं थौं सुथंनिसें प्रम निवास वालुवाटारय् माओवादी, एमाले व कांग्रेसया मंकाः बैठक न्ह्यानाच्वंगु दु । तर लगातार न्याघौ तक बैठक च्वनेधुंकाः नं उकिं छुं हे लिच्वः पिकाये मफुगु खँ सूत्रं धाःगु दु ।
स्वंगू राजनीतिक पार्टीतय्सं थ्व समस्या समाधान यायेगु ज्या सहमतिया हे लिधंसाय् यायेगु धकाः खँल्हाबल्हा यानाच्वंगु दु । तर सहमति गय् यानाः पिकायेगु धइगु खँय् धाःसा छुं च्वः लुइके फयाच्वंगु मदुनि ।
थौं स्वंगू पार्टीया मंकाः बैठक च्वनेधुंकाः हानं निगू निगू पार्टीया बैठक नं च्वनेगु धकाः सहमति जूगु दु । थ्व समस्याया समाधान सहमतिया लिधंसाय् यायेगु धकाः धाःसां यदि सहमति मलूसा याकःचां जूसां यायेगु सोच माओवादीं तयाच्वंगु खँ नं धाःगु दु ।
