प्रगतिशिल संविधानया निंतिं अन्तिम धक्का : प्रचण्ड
एकीकृत नेकपा (माओवादी)या नायः पुष्पकमल दाहाल 'प्रचण्डं' प्रतिक्रान्तिकारीतय्सं शान्ति व संविधान निर्माण विरुद्ध षड्यन्त्र यानाच्वंगु दावी यानादीगु दु ।
माओवादीया भातृ संगठन अखिल (क्रान्तिकारी)या पदाधिकारीतनाप सोमवाः च्वंगु मुँज्याय् प्रचण्डं प्रतिक्रान्तिकारी शक्तितय्त परास्त यायेत व प्रगतिशिल संविधान निर्माणया निंतिं अन्तिम धक्का आवश्यक जूगु धयादिल । वय्कलं अन्मित धक्काया निंतिं तयारी यायेत नं विद्यार्थी नेतातय्त निर्देशन बियादिल ।
वय्कलं अन्तिम धक्का धइगु जनविद्रोह जूगु धासें व्यापक जनपरिचालन सहित जनविद्रोहलय् वनेमाःगु अवस्था वयेत्यंगुलिं थुकी तयार जुइत निर्देशन बियादीगु खः ।
अथेहे वय्कलं जनविद्रोहलय् व्यापक परिचालन यायेफुम्ह नेतृत्वयात आः जुइत्यंगु अखिल क्रान्तिकारीया १८क्वःगु महाधिवेशन पाखें ल्ययेत बः बियादिल । मुँज्याय् मंसिर २४ गते निसें किपुलि जुइत्यंगु क्रान्तिकारीया महाधिवेशनया बारे नं सहलह जूगु खः ।
