भिक्षु शोभित प्रव्रजित जुयाबिज्याःगु २९ दँ
येँ (सन्ध्या टाइम्स)/गण महाविहारया प्रमुख भिक्षु शोभित महास्थवीरया २९ क्वःगु प्रवज्या उपसम्पदाया लसताय् अभिनन्दन व सम्मान ज्याझ्फ्वः जुल। ज्याझ्वलय् मूपाहांकथं बिज्याःम्ह उपसंघनायक भिक्षु अश्वघोष महास्थरिपाखें भन्ते फ्राखु विशाल धम्म शोभित महास्थवीर व अनागरिका धम्मदिन्नायात अभिनन्दन यानाबिज्याःगु खः ।
ज्याझ्वलय् हनेबहःपिं भन्तेपिंत वसपोलपिं मदयेधुंकाः वसपोलपिनि योगदानया कदर यायेगु स्वयां वसपोलपिं दनिगु इलय् हे कदर यायेगु च्वछायेबहः जुइगु तायेकाः न्यादँ न्ह्यवंनिसें बुद्ध धर्मय् दुथ्यानाः योगदान बियाः थुगु धर्मया प्रचार प्रसार यानाबिज्याःपिं भन्तेपिंत हनेगु तातुनाः थुगु ज्याझ्वः न्ह्यागु खँ ज्याझ्वःया नायः शोभित महास्थवीरं कना बिज्याःगु खः। उगु हे ज्याझ्वलय् श्रद्धेय भन्तेयालिसें विहारया उपासक-उपासकपिंत नं हनेगु ज्या जूगु खः ।
उगु विहारया नापं बुद्ध धर्मय् आपालं योगदान यानादीपिं उपासक-उपासिकापिं बखतबहादुर चित्रकार, हर्षमुनि शाक्य, प्रेमलाल चित्रकार, केशरी बज्राचार्य व घनश्याम राजकर्णिकारपिंत नं हनापौ लःल्हाःगु खः ।
ज्याझ्वःया मू पाहां भिक्षु अश्वघोष महास्थवीर व विशेष पाहां भिक्षु कुमार काश्यप महास्थवीरपाखें दीप प्रज्ज्वलन यानाः न्ह्याकूगु उगु ज्याझ्वलय् भिक्षु कुमार काश्यप महास्थवीरं शील प्रार्थना यानाबिज्याःगु खः। ज्याझ्वलय् विशेष पाहां कथं श्रीलंकाया राजदूत थीसपाल हेवर्गें नं झाःगु खः ।
