राष्ट्रपतिया अधिकार गुलि ?

नेपाःया इतिहासय् न्हापांखुसी वःम्ह राष्ट्रपतिया अधिकार ज्या व कर्तव्य गय् गथे धइगु खँयात कयाः विवाद पिहां वःगु दु । आः नकतिनि वय्कःयात नापलाः वंपिं नागरिक समाजया मनूतलिसे खँ ल्हासें वय्कलं प्वंकादीगु बिचाः थ्व इलय् तःधंगु विवादय् लानाच्वंगु दु । नागरिक समाजया प्रतिनिधितय्सं पिने वयाः खुल्ला रुपं राष्ट्रपतिया आलोचना समेत यानाच्वंगु दु गुगु गणतान्त्रिक नेपाःया निंतिं बांलाःगु खँ मखु ।

खास यानाः प्रधानसेनापति रुक्मांगद कटवालयात चीकेगु सवालय् राष्ट्रपति डा. रामवरण यादवं प्रधानमन्त्रीयात लिखित पौ हे बियाः 'सुझाव' बिउगु खँयात कयाः विवाद वयेवं नागरिक समाजया छथ्वः मनूत वय्कःयाथाय् वार्ता याःवंगु खःसा उगु इलय् राष्ट्रपति यादवं थः आलंकारिक मखु संवैधानिक राष्ट्रपति जूगु कारणं थःगु नं छुं भूमिका दइ धकाः दावी यायेवं विवाद झन तच्वया वंगु खः । नेपालय् थौंकन्हय् गज्याःगु शासन व्यवस्था दु व अन गज्याःम्ह राष्ट्रप्रमुख नियुक्त यानातःगु दु थुकिं हे स्पष्ट याः नेपाःया वर्तमान अवस्थाय् राष्ट्रप्रमुखया भूमिका छु खः ? खय्फु छता निता खँय् राष्ट्रपितं थःगु भूमिका क्यनेफु । तर अज्याःगु भूमिका प्रधानमन्त्रीया इच्छा स्वयां फरक धाःसा जुइ फइ मखु । छुं जुयाः राष्ट्रपितं थःगु फरक भूमिका क्यनेगु कुतः यात हे धाःसां नं प्रधानमन्त्रीं उकियात पनेफु । अज्याःगु इलय् राष्ट्रपति थम्हं छीधुंकूगु पलाःपाखें नं लिचिले मालीगु अवस्था वइ । थुकिं राष्ट्रप्रमुख व सरकार प्रमुख दथुइ दूरी ताःहाकः याना बीगु बाहेक मेगु छुं नं उपलब्धी चूलाकी मखु । थज्याःगु अनावश्यक तनाव बारे नं पार्टीतय्सं बिचाः यायेमाःगु दु ।

More Stories Like this