यातायात व्यवसायीपाखें सवारी साधन तोडफोड
येँ (सन्ध्या टाइम्स)/कर्णाली रिभर यातायातं थःपिंसं रुट परमिट काये मखन धकाः थौं कैलाली बन्द आह्वान यानाः न्यागः बस, छगः ट्रक व छगः मोटरसाइकल तोडफोड याना बिउगु दु ।
थौं सुथंनिसें हे कर्णाली रिभर यातायातया ब्यवसायीत सतकय् कुहां वयाः राजमार्ग ठप्प याःगु दु। इमिसं चिसापानी बौनियाँ लागाय् ना. ४ ख २५०२, ना. ३ ख ३६८२, ना. ३ ख ३८८९, ना. ३ ख २६५३ व ना. ४ ख २७५ नम्बरया बस व नम्बर सीके मफुनिगु मोटरसाइकल तोडफोड याना बिउगु दु ।
फुक्क हे प्रक्रिया पूरा याःसां नं यातायात माफियात व सिण्डीकेट लगे यायेगु षडयन्त्र यानाः जिल्ला प्रशासन ज्याकू कैलाली व सेती अञ्चल यातायात व्यवस्था कार्यालयपाखें रुट परमिट मबिउगुलिं धकाः कर्णाली रिभर यातायातं थौं कैलाली जिल्लाय् आम हडताल आह्वान याःगु खः ।
बन्द आह्वान यानातःगुलिं कैलाली जिल्लाय् यातायात, बजाः, उद्योग, कलकारखाना, शिक्षण संस्था तकं बन्द जूगु दु। अथे यातायात, कलकारखाना तकं बन्द जूगुलिं उगु लागाया जनजीवनय् प्रभावित जूगु दु ।
