गोपनीयता भंग यायेत्यंगु प्रति अमेरिका पाखें खेद व्यक्त
थीथी देय्या गोप्य सूचंत पिने हयाः तहाल्का ब्वलंकाच्वंगु विकिलीक्सं नेपाः स्थित अमेरिकी राजदुतावासया गोप्य सूचंत सार्वजनिक यायेत्यंगु प्रति खेद व्यक्त याःगु दु ।
नेपाः स्थित अमेरिकी राजदुत स्कट एच. डेलिसीं मंगलवाः छगू विज्ञप्ति पिथना गोप्य उदेश्यया निंतिं दुगु छुं नं सूचंया खुलासायात अमेरिकां खेद प्वंकीगु धाःगु दु । थ्वस्वयां न्ह्यः अमेरिकाया अफगानिस्तान व इराक युद्ध सम्बन्धि गोप्यं सूचं पितहःगु प्रति अमेरिकी राष्ट्रपति ब्याराक ओबामा, विदेश मन्त्री हिलारी क्लिनटन, पेन्टागन लगायतं आपत्ति प्वंकूसें उकीयात गैर कानुन ज्याया संज्ञा ब्यूगु खः ।
विकिलिक्सं नेपाःया अमेरिकी राजदुतावासया २,२७८ गोप्य सूचंत सार्वजनिक यायेगु बुखँ सार्वजनकि जुइवं अमेरिकी राजदुतावसं नं विज्ञप्ति पिथना आपत्ति प्वंकूगु खः । अमेरिका राजदुत डेलिसीं गोप्य सूचंया विश्वसनीयताया बारे जिम्मा थःम्ह कायेमफइगु धयादीगु दु । गोपनीयता पक्का यायेत आवश्यक पलाः ल्वनीगु धासें शान्ति, सुरक्षा व अन्तर्राष्ट्रिय स्थिरता कायम यायेत गोपनीयता आवश्यक जूगु खँ नं विज्ञप्ति न्ह्यथनातःगु दु ।
