सरकार पाखें सुरक्षा अधिकृततय् जिम्मेवारी हेरफेर
न्हूगु सरकार गठनय् ब्वनाच्वंगु अन्यौलताया दथुइ काम चलाउ सरकारं नेपाल प्रहरी व सेनाय् जिम्मेवारी हेरफेर याःगु दु ।
मंगलवाः सुथय् सिंहदरवारय् च्वंगु मन्त्रिपरिषदया मुँज्याय् सरकारं ६म्ह प्रहरी अतिरित्त महानिरीक्षकया सरुवा यायेगु निर्णय याःगु दुसाः ३म्ह सैनिक सहायक रथीया पदावधि थपया नापं छम्ह सहायकरथीयात उपरथीलय् बढुवा याःगु दु ।
सरकारं महनगरीय प्रहरी आयुक्त मदन खड्कायात प्रहरी प्रधान ज्याकू नक्शालय् सुरुवा याःगु दुसाः अर्जुनजंग शाहीयात महानगरीया आयुक्तय् सरुवा याःगु दु । अथेहे कल्याण तिमल्सिना, प्रकाश कुँवर व नरेश गुरुङयात नं प्रहरी प्रधान ज्याकूथी सुरुवा याःगु दु ।
उखे प्रहरी प्रतिष्ठानय् किरण गौतमयात यंकूगु दुसाः वरिष्ठ प्रहरी उपरिक्षक महेशसिंह कठायत व अर्मतकाजी श्रेष्ठयात प्राविधिक नायव महानिरीक्षकय् बढुवा याःगु दु ।
अथेहे मुँज्यां सेनाया सहायक रथी प्रतिकविक्रम राणायात उपरथीलय् बढुवा याःगु दु । सेना सहायक रथी विनोद बस्नेत, सैनिक कल्याणकारी निर्देशनालयया निर्देशक पूर्णचन्द्र थापा व उमेशकुमार भट्टराईयात म्याद ३दँ थप यायेगु निर्णय याःगु दु ।
मुँज्यां प्रधानमन्त्री माधवकुमार नेपालया विदेश भ्रमणया ज्याझ्वःयात नं स्वीकृति ब्यूगु दु । प्रधानमन्त्री नेपालं थौं हे एसियाली राजनीतिक दलतय् संगठन आईक्यापया १४क्वःगु सम्मेलनय् ब्वति कायेत उखे पाखे वनीगु ज्याझ्वः दु । नेपालं वयां लिपा ब्रसेल्सय् जुइगु तस्कं कम विकसित राष्ट्रतय् सम्मेलनय् ब्वति कयादी ।
