पदाधिकारी मनोनयनय् विवाद यथावत
नेपाली कांग्रेस दुने पदाधिकारी मनोनयनया विषयलय् ब्वलंगु विवाद अझ ज्यनेमफुनी । कांग्रेस सभापति सुशील कोइरालां म्हिगया केन्द्रीय समितिया मुँज्याय् उपसभापतिलय् रामचन्द्र पौडेल व महामन्त्रीलय् कृष्णप्रसाद सिटौलाया नां प्रस्ताव यायेवं विवाद ब्वलंगु खः ।
विवादया दथुइ थौं हानं च्वंगु मुँज्याय् अधिकांश केन्द्रीय दुजःतय्सं सभापति कोइरालायात थःगु प्रस्ताव लितकायेत दबाव ब्यूगु दु । अधिकांश दुजःतय्सं सभापतिया प्रस्ताव पार्टीया विधान अःख जूगु द्वपं ब्यूगु खः ।
केन्द्रीय दुजःत एनपी साउद, बालकृष्ण खाँण लगायतं सभापतियात प्रस्ताव विधान कथं मजूगु धासें प्रस्ताव लितकायेत इनाप याःगु खः । पार्टीया वरिष्ठ नेता शेरबहादुर देउवा पक्षधरत थुगु प्रस्ताव विपक्षय् दुसाः स्वयम सभापति कोइराला पक्षधरत सुजाता कोइराला, अर्जुननरिसंह केसी, गगन थापा लगायतं नं उगु प्रस्तावया विरोध यानाच्वंगु दु ।
विवादया दथुइ कन्हय् ३ बजे हानं पार्टी ज्याकू यलया सानेपाय् मुँज्या च्वनीगु ज्याझ्वः दु ।
