खनालयात ओली पक्षया दबाव
येँ (सन्ध्या टाइम्स)/संसदय् जुइगु प्रधानमन्त्रीया चुनावय् नेपाली कांग्रेसया उम्मेदवार रामचन्द्र पौडेलयात त्याकेगु निंतिं एमाले स्थायी समितिया दुजः केपी शर्मा ओली पक्षधरतय्सं थःगु हे पार्टी दुने दवाव बियाहःगु दु ।
माओवादीं थःगु विस्तारित बैठकय् तकं जनसेना यंकूगु नापं उपिं शान्ति प्रक्रियायात निष्कर्षय् थ्यंकेगु पक्षय् मदुगुलिं एमाले माओवादीनाप मखुसें कांग्रेसनाप वनेमाः धकाः ओली पक्षं दवाव बियाहःगु खः। उपिं पुलांगु हे राजनीतिक गठबन्धन कायम यानाः वनेमाः धइगु पक्षय् दुगु खँ एमाले सूत्रं धाःगु दु ।
थ्वहे वइगु २८ गतेनिसें जुइगु एमाले केन्द्रीय कमिटीया बैठकय् ओली पक्षं प्रधानमन्त्री पदय् कांग्रेसया पौडेलयात त्याकेत म्हितेमाःगु भूमिकाया बारे तयारी नापं यानाच्वने धुंकूगु खँ नं सूत्रं धाःगु दु ।
थ्वहे झ्वलय् एमालें थःपिनि केन्द्रीय कमिटीया बैठक च्वनेधुंकाः जक व्यवस्थापिका संसदया अधिवेशन सःतेगु बारे पार्टीगत रुपं आधिकारिक धारणा पित बीगु जूगु दुसा मेखे माओवादी व नेपाली कांग्रेसं धाःसा याकनं हे संसदया अधिवेशन सःतेगु नितिं सभामुख सुवास नेम्वाङयात म्हिगः हे इनाप यायेधुंकूगु खः ।
